【店長選物誌vol.11】

Backpack背囊 • 上篇

緊接上回嘅褸/外套，今回選物誌講嘅係背囊，作為一位工作及興趣都跟山有關的人，基本上日常都會使用登山背囊。先帶個頭盔講吓使用者背景，懶，非常懶，懶到出汁，所以特別鍾意Roll top袋貪可以單手快速拎嘢，加上有部分Roll top背囊防水力比雨笠更勁，而且大部分登山形式係Trekking Peak攻頂或高海拔trekking，加少量雪山攀登，所以除背囊以外，裝備都係以上用途為主而選擇，以下都係自2009年登山以來常用或有需要分享的背囊。由於篇幅所限，今次背囊店長有好多廢話想講，所以將會分成上下兩篇，咁店長就可以瘋狂9up。

圖1-6/HMG 2400 Windrider / 3400 Southwest / Summit pack
大家都非常熟悉嘅HMG，亦係UL入門至中高階都通用的品牌，55L淨重不到1kg但負重可達18kg，背部內藏可拆式鋁架，DCF料加上weather seal全天候防水，40L或以上每款都有唔同尺碼，以上就係15年買第一個HMG 3400時被吸引嘅地方，7年後嘅今日，用佢走過外國30幾座高山，依然係我所有背囊入面最堅固最可靠，可惜近年轉咗產地，品質的確係參差不齊，不過最近友店 @morimori__outdoorhk 終於成功引入行貨，大家都可以上去試下先再決定，個人覺得HMG仍然係UL入門嘅首選，最大原因係佢嘅負重，18kg基本上已經係重裝亦甚少UL人會去到呢個重量，玩UL一般入門以一星期海外登山為例，全脫水食物也差不多6kg，還有登山裝備或攝影器材，總重量應該介乎10-16kg，這重量放在其他UL背囊一定超負荷，好快會爛，關於UL又係另一樣嘢，有機會再詳談。

圖7-8/Arc’teryx Alpha FL 30
呢個都係店長其中一個最喜愛嘅背囊，記得當時由Klättermusen Allsvinn轉用呢個背囊好似發現新大陸咁，原來背囊可以咁輕又防水又靚，當時一街都係Arro 22，竟然冇人發現呢個寶，呢個袋嘅開袋方法好特別，所以去容易俾人偷嘢嘅地方旅行都會用嚟做Day pack。不過背板薄同硬，香港咁熱好少着厚衫，如果行一啲要長期俯身嘅路線，瘦人嘅尾龍骨背位好快會磨損，始終佢係一個alpine袋，所以去爬雪山就非常好用。可惜嘅係用膠痴嘅防水袋終有一日會解體，用咗五年後正式退休，後來買左HMG Summit Pack代替，不過都係呢個好用啲，有機會呢個袋減價都要買返個。

圖9/Atom Packs The Atom EP30 (Custom)
來自英國嘅Atom Packs幾年前經友人介紹已想試吓，不過當時冇乜錢又同30L嘅背囊用途重複咗，舊年年頭終於訂造咗一個30L，唔買現成而訂製嘅原因都好on9，就係現成雖然成個黑色，但橡筋繩個織帶係紅藍色，所以果斷訂製改成黑白灰，當時呢個袋係用嚟UL Fast packing同summit pack預裝2-3kg，所以都冇做腰帶再輕啲，係有少少後悔貪輕嗰10g冇整底袋，到正式使用時對個背囊嘅質素非常驚嘆，成個袋手工極好，背帶闊度間距都好啱本人，已成2021新寵，用咗幾次直頭想訂多個60L，不過已經有HMG 3400就唔嘥呢啲無謂錢，又冇得飛，下年先算。

圖10/Yamatomichi MINI2
如果HMG係香港最多人揹嘅UL背囊，山と道應該都穩佔第二，加上近日朝偉風加持，如果正常買到嘅應該可以超越HMG，因為比起HMG應該有更多唔行山嘅人有個山と道傍身。老實講，店長對山と道本身係偏向負面，因為剛開始行山時都略有所聞山と道嘅嘢好易爛，而且基本都要食炒，所以一直都冇買，到前年打算試多啲牌子就買左個返嚟，用咗兩三次後覺得其實唔差，質素同價錢完全成正比甚至可以話抵（原價），物料同設計都明顯係經過深思熟慮，部分款式更可以成個訂造，比起其他日本牌子可以話係超值（原價）但係呢個牌子嘅袋絕對唔適合入門使用，好多人問背囊都係HMG山と道二選一，喺呢度可以400%講句，問得出呢個問題都唔使諗買山と道，以本人用過嘅MINI2為例，官網寫負重8kg，但實際其實5kg已經差唔多極限，裝8kg已經開始唔舒服，同埋幾個朋友背帶接駁位都爆線，除非可以執到個袋5kg以下，唔係一律不建議買。但綜觀成個袋絕對係一個好好嘅UL袋，只係要多啲經驗對要帶嘅物品作出取捨。

上篇就講住咁多先，呢幾個都係現時最熱門嘅背囊牌子款式嘅用後感，有咩交流都可以一齊傾下，敬請期待下篇一啲比較冷門但實用嘅背囊。

#HAKDIMstore #黑店 #店長選物誌 #hyperlitemountaingear#arcteryx #atompacks #yamatomichi