【店長選物誌vol.10】
呢幾日冷鋒加季候風夾擊，各位有冇着多件衫？【店長選物誌】又返嚟喇，今集嚟到第十回就講吓外套。以下咁多件褸全部由2014年店長出國行山開始著到而家，當中有一啲新買亦有一啲已經賣咗，有大部分已經停產或者推出咗新版本。黑色褸或者對fashion或行山都係好普通嘅必備顏色，但店長揀咗呢一啲褸去縱橫四海係因為款式同spec好適合，唔講咁多廢話，而家就介紹返。
圖1/ The North Face Thermoball Eco Hoodie
第一件就係由14年9月開始陪伴店長登上幾十座外國山峰，最忠實嘅伙伴 TNF Thermoball！呢件由人造纖維代替羽絨嘅mid layer insulation hoodie，Fill Power約等於羽絨嘅650FP，防水力較當時嘅羽絨高，店長亦曾經試過喺台灣高山淋足個半鐘大雨依然保溫。呢件亦係近8年著用率最高，366g輕量而且保溫能力高，甚至俾啲fd笑由零上20度至零下20度都係著呢一件，近日咁撚凍嘅天氣，店長都只係Tee加呢件Thermoball就如常活動。
圖2/ Klattermusen Ask Jacket
以前曾經係瑞典牌子Klattermusen嘅狂迷，而呢件亦係首件自費嘅防水褸，喺2013年暴雨富士一役後，不停搵負擔得到又靚嘅防水褸，等左兩年後O記終於減價到$3000以下順利入手，呢件褸用PFOA-free防水塗層，內置Recco® 雪崩救援系統、指南針、哨子、超大拉鏈中袋，與其話係防水褸，其實係一件滑雪褸，亦係目前店長最鍾意嘅防水褸，可惜後來轉UL裝備，因細節位多使重量增加，其後新增UL系列，款式同價錢都唔係店長杯茶，最慘係件褸嘅防水層已經完全粉碎...
圖3/ Fjallraven Eco-Shell Jacket
注重環保嘅瑞典牌子Fjallraven嘅首件自家環保物料防水層嘅防水褸，唔使再辛苦上蠟，當時岩岩好接替件Klattermusen Ask Jacket，整體重量更輕，3年冇著啱啱拎出嚟影相都仲好健康，由於北歐牌子Size較大，矮小嘅店長都只係著細碼，不過價錢比起一般防水褸貴，但為左環保都OK啦。
圖4/ Patagonia Classic Retro-X Fleece Jacket
呢件又係經典嘢，早幾年炒返起好多牌子都出差唔多款，呢款係嚟自70年代款式復刻版，雖然真係超暖（零度淨著Tee加呢件都OK）但實在太大舊太重，只係曾經新屎坑帶埋去行EBC，之後就冇再帶出國行山。
圖5/ Patagonia Storm Racer Waterproof Running Jacket
經朋友介紹購買嘅防水褸，只有183g重，比起大部分hard shell輕約3倍，近年去台日行山都冇帶hard shell只帶呢件Storm Racer，入面著Patagonia R2 Fleece或再凍就加件TNF Thermoball，已經夠適應大部分環境。不過留意返心口個袋是會裝水嘅，同埋防水效能當然比唔上hard shell，想輕裝就要配合自己能力同對路線嘅計劃作出取捨。
圖6/ Rab Positron Pro Down Jacket 呢件其實從來都未著過，因為2016年去EBC特別買咗件Arc’teryx Thorium AR Hoody做最外層Insulation，直到2018年去完Kilimanjaro凍撚到仆街發覺唔夠暖就賣咗Thorium買Rab準備下一座大山，結果19年冇去Aconcagua去咗行Mont Blanc，因為Mont Blanc唔係好凍所以都係Gamma MX＋Thermoball已經夠做，然後就沒有然後了，直到啱啱拎出嚟影相，牌都未剪。順帶一題，呢件當時買咗灰色，係因為唔想個人黑色一舊覺得衫或褲淺色少少都靚（另有兩條灰銀色嘅防水褲同羽絨褲）同埋特價得藍同灰色。
圖7/ Arc’teryx Gamma MX Hoody
其中一件長年係網上Best 10 Soft Shell 加性價比最低嘅選擇，但店長特別鍾意呢件Soft Shell，最後都皇天不負冇錢人，獲得朋友超大折扣成功入手。因為重量問題有時都好雞肋，會寧願著Storm Racer＋Thermoball，不過隨住店長肥咗冇咁怕凍，反而多咗著Gamma MX。衫腳前短後長，活動上嚟比較舒適唔會紮住下身。
圖8/ Uniqlo Blocktech Coat
呢件係完全唔關行山事，不過成日見到D北歐韓國OPPA著大褸好型，但店長又唔鍾意啲厚屎揼揼嘅大褸，見到Uniqlo呢件減價又輕就無慮即決。
圖9/ IP AXIS Functional Kimono
店長有輕度中二病同熱衷日本傳統文化，有次偶然喺IG見到廣告就即刻買咗，實物亦非常喜歡，即使Techwear化後亦保持到現代同傳統平衡唔會太中二，嚟緊記得留意黑店，因為我哋都即將有售！
各位可能留意到有兩件有題過但冇特別講，就係Patagonia R2 Fleece同Arc’teryx Thorium AR Hoody，前者因為肥咗唔啱著所以想賣咗再買，點知原來2016年版嘅全黑Logo已經轉返做彩章Logo！ 下回講背囊！多謝！
#HAKDIMstore #店長選物誌